ಪ್ರೇಮಿಯೊಬ್ಬನ ಚರಣಗೀತೆ : Sad Love Poetry in Kannada - Sad Feeling Kavana

ಹೃದಯವನ್ನು ತಣಿಸೆ ನನ್ನೊಂದಿಗೆ ಮಾತಾಡಿ

ಮರೆಯಾಗಿ ನೋಯಿಸದಿರು ನನ್ನನ್ನು ಕಾಡಿ

ಮಾತಾಡುವ ಬಾಯಿಗೆ ನೀನಾದೆ ಬೆಡಿ

ಕವಿತೆಗಳಿಂದ ತುಂಬಿದ ಮನದ ಜಾಡಿ...

ನಿನ್ನ ದೃಷ್ಟಿಯಲ್ಲಿ ನಾ ಹೇಗೆ ಕೇಡಿ?

ಯಾರು ಹೇಳಿದರು ನಿನಗೆ ನನ್ನ ಚಾಡಿ?

ಅತ್ತು ಕೆಂಪಾಗಿವೆ ಕಣ್ಣುಗಳು ಬಾಡಿ

ಸರಿಯಿಲ್ಲವೇನೆ ನಮ್ಮಿಬ್ಬರ ಪ್ರೇಮ ಜೋಡಿ?

ಬಾಳನ್ನೇ ಸುಡುತ್ತಿದೆ ನಿನ್ನ ಕೋಪದ ಕಿಡಿ

ಜಗವೇ ನಗುತ್ತಿದೆ ನನ್ನ ವ್ಯಥೆಯಾ ನೋಡಿ

ನಿನ್ನ ಮಡಿಲೇ ನನ್ನ ನಿದ್ರೆಗೆ ಜೋಪಡಿ

ಅದಕ್ಕಿರಲಿ ನಿನ್ನ ಪ್ರೀತಿಯ ಭದ್ರಗಡಿ...

ಕೆಟ್ಟ ಮಾತಿಗೆ ವೇದಿಕೆ ಊರ ಚಾವಡಿ

ಅಲ್ಲಿ ಕೇಳಿದೆಯೇನೆ ನನ್ನ ಲೇಬಡಿ?

ತಪ್ಪಿಲ್ಲದಿದ್ದರೂ ಬಾಗುವೆನು ನಿನ್ನ ಪಾದದಡಿ

ಕ್ಷಮಿಸೆಂದು ಕೇಳುವೆನು ದಯಮಾಡಿ....

ನೀನಿಲ್ಲದ ನಾನು ದೇವತೆಯಿಲ್ಲದ ಗುಡಿ

ನೀನಾಗದಿರು ಎನಗೆ ಬರೆಕೊಡುವ ಛಡಿ

ಸಂದೇಹವೇಕೆ ನೀನೇ ನನ್ನ ನರನಾಡಿ

ಮೆಚ್ಚಿಸಲೇ ನಿನ್ನ ಗುಣಗಾನ ಮಾಡಿ?

ಬೆನ್ನು ತಟ್ಟಿಕೊಳ್ಳುತ್ತಿದೆ ವಿಧಿ ಆಟವಾಡಿ

ನೊಂದ ಜೀವದ ಮೇಲೇಕೆ ನಿನ್ನ ಸಿಡಿಮಿಡಿ?

ಸಂತೈಸು ಸಂತಸದಿ ಪ್ರೇಮಗೀತೆ ಹಾಡಿ

ಇಲ್ಲವೇ ಬಿಳ್ಕೊಡು ದು:ಖದಿ ಚರಣಗೀತೆ ಹಾಡಿ....