ವಿರಹದ ವಿಷ : Sad Love Poetry in Kannada - Sad Kavana in Kannada

ಗರ್ಜಿಸುವ ಸಿಡಿಲೆದುರಾದರೂ ಸೋಲದ

ಸೆಲೆ ನನ್ನದಾಗಿರುವಾಗ, ನಿನ್ನ ಆ

ವಿರಹದ ಗುಡುಗನ್ನು ಬಿಗಿದಪ್ಪಿಕೊಳ್ಳುವ

ಕಲೆಯನ್ನು ಕಲಿಸಿ ದೂರ ಹೋಗಬಾರದಿತ್ತೆ..?

ಸಪ್ತ ಮಹಾಸಾಗರಗಳ ಆರ್ಭಟವನ್ನು 

ಎದುರಿಸುವ ಧೀರ ನಾನಾಗಿರುವಾಗ,

ನಿನ್ನ ಆ ವಿರಹದ ಪ್ರವಾಹದಲ್ಲಿ ಈಜುವ

ಛಲವನ್ನು ಬೆಳೆಸಿ ಮರೆಯಾಗಬಾರದಿತ್ತೆ..?

ಕಾದ ದೈತ್ಯಧರೆಗೆ ಮಳೆ ಸುರಿಸಿ ತಂಪು

ನೀಡುವ ಆಸೆ ನನ್ನದಾಗಿರುವಾಗ, ನಿನ್ನ ಆ

ವಿರಹದ ಬೆಂಕಿಮಳೆಗೆ ಆಸರೆಯಾಗಿ ಒಂದು

ಪ್ರೀತಿಯ ಕೊಡೆಯನ್ನಾದರೂ ಕೊಡಬಾರದಿತ್ತೆ..?

ಸಾಗರದಷ್ಟು ಹಾಲಾಹಲ ವಿಷ ಪಾನಿಸಿದರೂ

ಬದುಕುವ ಹಟ ನನ್ನಲ್ಲಿರುವಾಗ, ನಿನ್ನ ಆ

ವಿರಹದ ವಿಷದಿಂದ ನನ್ನ ಉಳಿಸಲು 

ನೀ ಮತ್ತೆ ಅಮೃತವಾಗಿ ಬರಬಾರದಿತ್ತೆ..?